სახიფათო ტვირთის გადაზიდვის სპეციალისტი (შემდგომში - სპეციალისტი) არის სათანადო ცოდნისა და კვალიფიკაციის მქონე ფიზიკური პირი, რომელიც ფლობს სსიპ - სარკინიგზო ტრანსპორტის სააგენტოს მიერ გაცემულ შესაბამის სერტიფიკატს.

სახიფათო ტვირთის უსაფრთხო გადაზიდვის უზრუნველსაყოფად, იურიდიული პირი, რომლის საქმიანობა მოიცავს სახიფათო ტვირთის რკინიგზით გადაზიდვას ან/და მასთან დაკავშირებულ საქმიანობას (სახიფათო ტვირთის შეფუთვას, დატვირთვას, გადმოტვირთვას ან/და დახარისხებას) ვალდებულია, ჰყავდეს ერთი ან ერთზე მეტი სახიფათო ტვირთის გადაზიდვის სპეციალისტი.

სპეციალისტის ძირითადი ფუნქციაა სახიფათო ტვირთის გადაზიდვის ან/და მასთან დაკავშირებული საქმიანობის წარმართვის ხელშეწყობა სახიფათო ტვირთების გადაზიდვის საერთაშორისო რეგულაციებითა (RID/SMGS) და საქართველოს კანონმდებლობით განსაზღვრული მოთხოვნების შესაბამისად.

სპეციალისტის საქმიანობა მოიცავს კომპლექსურ მიდგომას, რაც სამ ძირითად მიმართულებად იყოფა:

მონიტორინგი - ახორციელებს სახიფათო ტვირთების გადაზიდვის საერთაშორისო რეგულაციებისა (RID/SMGS) და საქართველოს კანონმდებლობით დადგენილ მოთხოვნებთან შესაბამისობის მონიტორინგს;                           

რეკომენდაციების გაცემა - გასცემს შესაბამის რეკომენდაციებს იურიდიული პირისთვის, სახიფათო ტვირთის რკინიგზით გადაზიდვის ოპერაციებთან დაკავშირებული რისკების შესამცირებლად და უსაფრთხოების გასაუმჯობესებლად;

ანგარიშგება

იურიდიული პირისთვის ამზადებს წლიურ ანგარიშებს:

- ყოველი კალენდარული წლის დასრულებიდან 60 დღის ვადაში;

- სახიფათო ტვირთის რკინიგზით გადაზიდვის წესის XII დანართით განსაზღვრულ ფორმაში;

- თითოეული ანგარიში ინახება მომზადებიდან - 5 წლის განმავლობაში;

- ანგარიში მოთხოვნისთანავე წარედგინება სსიპ სარკინიგზო ტრანსპორტის სააგენტოს და სხვა უფლებამოსილ ორგანოს;

​ამზადებს შემთხვევის ანგარიშებს - იმ შემთხვევაში, თუ სარკინიგზო შემთხვევა ან ინციდენტი უარყოფით გავლენას ახდენს ადამიანის ჯანმრთელობაზე, ქონებაზე ან გარემოზე, სახიფათო ტვირთის გადაზიდვის, შეფუთვის, დატვირთვის ან გადმოტვირთვის დროს.

სპეციალისტის ყოლის ვალდებულება ვრცელდება შემდეგ იურიდიულ პირებზე:

- სარკინიგზო საწარმოზე, რომელიც საქართველოს ტერიტორიაზე ახორციელებს სახიფათო ტვირთის რკინიგზით გადაზიდვას;

- ტვირთგამგზავნზე, რომელიც საქართველოს ტერიტორიაზე რკინიგზით გადაზიდვის მიზნით, გადაზიდვის ხელშეკრულების შესაბამისად, გადამზიდველს გადასცემს სახიფათო ტვირთს;

- იურიდიულ პირზე, რომელიც ტვირთგამგზავნისთვის მომსახურების გაწევის ფარგლებში, შესაბამისი ხელშეკრულების საფუძველზე, ახორციელებს გადაზიდვასთან დაკავშირებულ ოპერაციებს: შეფუთვას/ დატვირთვას/შევსებას;

- ტვირთმიმღებზე, რომელიც ახორციელებს სახიფათო ტვირთის გადმოტვირთვას;

- იურიდიულ პირზე, რომელიც ტვირთმიმღებისთვის მომსახურების გაწევის ფარგლებში, შესაბამისი ხელშეკრულების საფუძველზე, ახორციელებს სახიფათო ტვირთის გადმოტვირთვას;

-  იურიდიულ პირზე, რომელიც ახორციელებს სახიფათო ტვირთის დახარისხებას.

სპეციალისტის დანიშვნა სავალდებულო არ არის შემდეგ შემთხვევებში:

- როცა ტვირთგამგზავნი ან ტვირთმიმღები სარგებლობს სხვა ორგანიზაციის მომსახურეობით, რომელსაც უკვე ჰყავს სპეციალისტი და ის ასრულებს დატვირთვა - გადმოტვირთვის სამუშაოებს;

- როცა ორგანიზაცია ასრულებს შეფუთვის ან დატვირთვის სამუშაოებს იმ ტვირთთგამგზავნისთვის, რომელსაც უკვე ჰყავს სპეციალისტი;

- როცა სახიფათო ტვირთის გადაზიდვა ხდება საქართველოს თავდაცვის ძალების სარკინიგზო ტრანსპორტით ან პასუხისმგებლობა მათზეა;

- როცა სახიფათო ტვირთის გადაზიდვა ხდება მცირე ოდენობით,  სახიფათო ტვირთების გადაზიდვის საერთაშორისო რეგულაციების (RID/SMGS) გათვალისწინებული გამონაკლისების ფარგლებში:

-   შეზღუდული ოდენობებით გადაზიდვა (LQ);

-   გათავისუფლებული ოდენობების გადაზიდვა (EQ);

- ერთი ვაგონით ან დიდი კონტეინერით გადასატან მაქსიმალურ საერთო რაოდენობებთან დაკავშირებული გადაზიდვები (RID-ის 1.1.3.6).

სპეციალისტების რაოდენობის განსაზღვრის შესახებ გადაწყვეტილებას იღებს იურიდიული პირი, მისი საქმიანობის მასშტაბისა და გეოგრაფიული არეალის გათვალისწინებით, ისე რომ შესაძლებელი  იყოს სპეციალისტის მიერ საკუთარი მოვალეობების ეფექტურად განხორციელება და უზრუნველყოფილი იყოს სახიფათო ტვირთთან დაკავშირებული ოპერაციების უსაფრთხოება.

სპეციალისტის ფუნქცია - მოვალეობები უნდა განისაზღვროს წერილობითი ფორმით, ხოლო იურიდიული პირი ვალდებულია უზრუნველყოს სპეციალისტის საქმიანობისათვის საჭირო ინფორმაციის, დამხმარე მოწყობილობებისა და აღჭურვილობის მიწოდება.

იურიდიულმა პირმა სააგენტოს უნდა აცნობოს სპეციალისტის ვინაობის შესახებ მისი განსაზღვრიდან 30 დღის ვადაში.

სახიფათო ტვირთის გადაზიდვის სპეციალისტის სერტიფიკატის მისაღებად პირმა უნდა გაიაროს სწავლება სააგენტოს მიერ აღიარებულ სასწავლო დაწესებულებაში და წარმატებით ჩააბაროს გამოცდა სააგენტოში.

სააგენტო აწარმოებს სპეციალისტთა რეესტრს და მათ საკონტაქტო ინფორმაციას აქვეყნებს სააგენტოს ოფიციალურ ვებგვერდზე.

კანონმდებლობით გათვალისწინებულ იურიდიულ პირებზე სპეციალისტის განსაზღვრის ვალდებულება ამოქმედდება 2027 წლის 1 იანვრიდან.